«Առողջապահությունը Հայաստանում. բարեփոխման պահը» խորագրով համաժողով

03 փետրվարի, 2026

Փետրվարի 2-ին Փարիզի 17-րդ շրջանի քաղաքապետարանում, Ֆրանսիայում Հայաստանի դեսպանության և «Santé Arménie» ասոցիացիայի համագործակցությամբ, կազմակերպվել է «Առողջապահությունը Հայաստանում. բարեփոխման պահը» խորագրով համաժողով։

Համաժողովին ելույթներ են ունեցել ՀՀ առողջապահության նախարար Անահիտ Ավանեսյանն (առցանց) ու Ֆրանսիայում Հայաստանի դեսպան Արման Խաչատրյանը: Կլոր սեղաններին որպես զեկուցողներ հանդես են եկել Ֆրանսիայի Եվրոպայի և արտաքին գործերի նախարարության առողջապահության հարցերի համակարգող Ժորժ-Ֆաբրիս Բլումը, «Santé Arménie» ասոցիացիայի նախագահ Արսեն Մեքինյանը, Ֆրանսիայի Հայ բարեգործական ընդհանուր միության նախագահ Նադյա Գործունյանը, ոլորտի առաջակարգ մասնագետներ, փորձագետներ, սփյուռքի ներկայացուցիչներ։

Առողջապահության նախարար Անահիտ Ավանեսյանն իր ելույթում ներկայացրել է 2025թ. դեկտեմբերին ընդունված առողջության համընդհանուր ապահովագրության մասին օրենքն ու Հայաստանում արդեն իսկ գործարկված ապահովագրության համակարգը։ Մտքեր են փոխանակվել Հայաստանում իրականացվող առողջապահական համակարգի բարեփոխումների շուրջ:

Իր խոսքում դեսպան Խաչատրյանը, անդրադառնալով Հայաստան-Ֆրանսիա բազմաոլորտ դինամիկ զարգացող հարաբերություններին, ընդգծել է առողջապահության ոլորտում համագործակցության կարևորությունը։

Հայաստանի դեսպանը շեշտել է, որ Հայաստանի կառավարության առաջնահերթություններից է Հայաստանի դիմադրողականության բարձրացումը, որի կարևոր բաղադրիչներն են ինչպես անվտանգության, տնտեսության, կրթության, այնպես էլ՝ առողջապահության կարողությունները։ Այս նպատակով Հայաստանի կառավարությունը ձեռնարկել է մի շարք կարևոր բարեփոխումներ առողջապահության ոլորտում։

Համաժողովին զեկուցողները ներկայացրել են «Santé Arménie»-ի կողմից տարիներ ի վեր Հայաստանում՝ ինչպես Երևանում, այնպես էլ մի շարք համայնքներում իրականացված առողջապահական ծրագրերն ու ընթացիկ նախագծերը։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր