Հայաստանի պետական կամերային նվագախմբի համերգը Մադլեն եկեղեցում

26 սեպտեմբերի, 2025

Սեպտեմբերի 25-ին, Ֆրանսիայում ՀՀ դեսպանության բարձր հովանու ներքո, Փարիզի խորհրդանիշ համարվող վայրերից մեկում՝ անվանի Մադլեն եկեղեցում առաջին անգամ համերգային ծրագրով հանդես է եկել Հայաստանի պետական կամերային նվագախումբը:

Այս համերգը կազմակերպվել է ՀՀ կրթության, գիտության, մշակույթի և սպորտի նախարարության հետ համագործակցաբար, ՀԲԸՄ Ֆրանսիայի գրասենյակի և «Հայաստանի դեսպանության բարեկամներ» միության աջակցությամբ:

Մադլեն եկեղեցու լեփ-լեցուն սրահում մաեստրո Սիփան Օլահի ղեկավարությամբ կամերային նվագախումբը ֆրանսիացի երաժշտասեր հանդիսատեսին է ներկայացրել Կոմիտասի, Արամ Խաչատրյանի, Ռոբերտ Ամիրխանյանի, Տիգրան Մանսուրյանի, ինչպես նաև Շառլ Ազնավուրի սիրված ստեղծագործությունները: Երեկոյի ընթացքում ելույթ են ունեցել սոպրանո Հայարփի Եղիկյանը, հոբոյահար Հակոբ Մուրադյանը և դաշնակահարուհի Սոնա Բարսեղյանը։

Ֆրանսիայում ՀՀ դեսպան Արման Խաչատրյանը համերգին իր բացման խոսքում կարևորել է հայկական հարուստ երաժշական ժառանգության հանրահռչակումը՝ ընդգծելով համերգի կարևոր դերակատարությունն այս գործում: Դեսպանը խորհրդանշական է համարել, որ համերգն անցկացվում է Հայաստանի Հանրապետության անկախության հոբելյանից ընդամենը մի քանի օր անց՝ այսպիսով վերածվելով Հայաստանի անկախության և ինքնիշխանության յուրօրինակ տոնակատարության:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր