Խորհրդակցություններ ՀՀ կառավարության և Ֆրանսիայի Զարգացման Գործակալության խմբի միջև

01 հուլիսի, 2025

2025 թվականի հուլիսի 1-ին Փարիզում տեղի են ունեցել Հայաստանի Հանրապետության կառավարության և Ֆրանսիայի Զարգացման Գործակալության (AFD) խմբի (AFD, PROPARCO, Expertise France) միջև առաջին տարեկան խորհրդակցությունները։

Միջոցառմանը մասնակցել և բացման խոսքով հանդես է եկել Ֆրանսիայում ՀՀ արտակարգ և լիազոր դեսպան Արման Խաչատրյանը։ Դեսպան Խաչատրյանը ընդգծել է Հայաստանի և Ֆրանսիայի միջև համագործակցության ռազմավարական բնույթը, կարևորել երկկողմ տնտեսական և զարգացման ծրագրերի շարունակական և արդյունավետ իրականացումը՝ ի շահ Հայաստանի կայուն զարգացման և երկու երկրների միջև բարեկամության ամրապնդման։

Հայկական պատվիրակության կազմում էին փոխվարչապետ Տիգրան Խաչատրյանի գրասենյակի ղեկավար Արման Ադիլխանյանը, խորհրդական Աննա Գասպարյանը, էկոնոմիկայի նախարարի տեղակալ Արման Խոջոյանը, տարածքային կառավարման և ենթակառուցվածքների նախարարի տեղակալներ Քրիստինե Ղալեչյանը և Վարդան Կոստանյանը։

Ֆրանսիական կողմից խորհրդակցություններին մասնակցել են Հայաստանում Ֆրանսիայի դեսպան Օլիվիե Դեկոտինին, AFD խմբի, Ֆրանսիայի Եվրոպայի և արտգործերի նախարարության, Ֆինանսների նախարարության ներկայացուցիչներ, ինչպես նաև մի շարք ոլորտային ծրագրերի ղեկավարներ։

Քննարկվել են համագործակցության ընթացիկ արդյունքները և ապագա ուղղությունները գյուղատնտեսության, կառավարման, շարժունակության և տրանսպորտի, քաղաքային զարգացման, սոցիալական բնակարանային ապահովման ոլորտներում։ Հատուկ ուշադրություն է դարձվել նաև տարածքային զարգացմանը և մշակութային ժառանգության պահպանությանը։ Անդրադարձ է կատարվել նաև 2021-2026 թթ․ հայ-ֆրանսիական տնտեսական համագործակցության ճանապարհային քարտեզի իրագործմանը ։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր