ՀՀ դեսպան Հասմիկ Տոլմաջյանն աշխատանքային այց է կատարել Մոնակոյի իշխանապետություն

22 նոյեմբերի, 2023

Նոյեմբերի 17-ից 19-ը Ֆրանսիայում և Մոնակոյում Հայաստանի դեսպան Հասմիկ Տոլմաջյանն աշխատանքային այց է կատարել Մոնակոյի իշխանապետություն։ Այցի շրջանակներում դեսպան Տոլմաջյանը հանդիպումներ է ունեցել Մոնակոյի բարձրաստիճան պաշտոնյանների հետ և մասնակցել է Մոնակոյի ազգային տոնի առթիվ կազմակերպված պաշտոնական միջոցառումներին։

Նոյեմբերի 17-ին դեսպան Տոլմաջյանը հանդիպումներ է ունեցել Մոնակոյի իշխանին առընթեր պետքարտուղար Իվետ Լամբին Բերտիի (Yvette Lambin Berti), Մոնակոյի վարչապետ Պիեռ Դարտույի (Pierre Dartout), արտաքին գործերի նախարար Իզաբել Բերրո-Ամադեիի (Isabelle Berro-Amadei), ինչպես նաև Իշխան Ալբերտ 2-ի աշխատակազմի ղեկավար Քրիստոֆ Շտայների (Christophe Steiner) հետ։ Հայաստանի դեսպանը զրուցակիցներին հանգամանալից ներկայացրել է Ադրբեջանի կողմից էթնիկ զտումների հետևանքով Լեռնային Ղարաբաղից բռնի տեղահանված 100 հազարից ավել հայ բնակչության առջև ծառացած խնդիրների կարգավորման, ինչպես նաև տարածաշրջանում խաղաղության և կայունության հաստատման ուղղությամբ Հայաստանի կառավարության գործադրած ջանքերը՝ այս համատեքստում կարևորելով միջազգային գործընկերների աջակցությունը։

Դեսպան Տոլմաջյանը մոնեգասկյան կողմին շնորհակալություն է հայտնել միջազգային տարբեր կազմակերպությունների շրջանակներում արդյունավետ համագործակցության համար։ Նշված հանդիպումների ընթացքում կողմերը գոհունակությամբ արձանագրել են, որ ընթացիկ տարին նշանավորվում է Հայաստանի և Մոնակոյի միջև դիվանագիտական հարաբերությունների հաստատման 15-ամյա հոբելյանով և այս համեմատաբար կարճ ժամանակահատվածում կողմերի միջև հաստատվել է բարձր մակարդակի ակտիվ քաղաքական երկխոսություն։ Երկուստեք ընդծվել է երկկողմ հարաբերությունների ամրապնդման և խորացման ուղղությամբ շարունակական համատեղ ջանքեր գործադրելու պատրաստակամությունը։

Մոնակո այցի շրջանակներում դեսպան Տոլմաջյանը հանդիպում է ունեցել նաև Մոնակոյում Ֆրանսիայի նորանշանակ դեսպան և այդ երկրում հավատարմագրված դիվանագիտական կորպուսի ղեկավար Ժան դ՛Օսոնվիլի (Jean d’Haussonville) հետ։

Նոյեմբերի 18-ին Հայաստանի դեսպանը մասնակցել է նաև Մոնակոյի ազգային տոնի կապակցությամբ իշխանապետությունում հավատարմագրված դիվանագիտական կորպուսի համար Իշխան Ալբերտ 2-ի անունից տրված պաշտոնական ընթրիքին։ Ընթրիքի ընթացքում դեսպան Տոլմաջյանը զրույց է ունեցել Մոնակոյի իշխանի հետ և վերջինիս շնորհակալություն է հայտնել Հայաստանի և հայ ժողովրդի շուրջ կատարվող զարգացումները մշտապես ուշադրության կենտրոնում պահելու և համերաշխության հայտարարություններով հանդես գալու համար։

Նոյեմբերի 19-ին Հասմիկ Տոլմաջյանը ներկա է գտնվել իշխանական ընտանիքի մասնակցությամբ Մոնակոյի տաճարում իշխանապետության ազգային տոնի առթիվ մատուցված Երախտագիտության պատարագին։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր