ՀՀ դեսպան Հասմիկ Տոլմաջյանը հանդիպել է Էքս-ան-Պրովանս քաղաքի քաղաքապետ Սոֆի Ժուասենի հետ

03 նոյեմբերի, 2023

Ֆրանսիայում ՀՀ դեսպան Հասմիկ Տոլմաջյանը Էքս-ան-Պրովանս քաղաք կատարած այցի ընթացքում հանդիպել է քաղաքապետ Սոֆի Ժուասենին։ Հանդիպմանը մասնակցում էին նաև Ֆրանսիայում Լեռնային Ղարաբաղի ներկայացուցիչ Հովհաննես Գևորգյանն ու Մարսելում ՀՀ գլխավոր հյուպատոս Արա Մկրտչյանը։

Հանդիպումից հետո դեսպան Տոլմաջյանն ու քաղաքապետ Ժուասենը մասնակցել և ելույթով են հանդես եկել Էքս-ան-Պրովանսի «Tapisseries» թանգարանում ֆրանսահայ հայտնի քանդակագործ Թորոս Ռասթկելենյանին նվիրված ցուցահանդեսին, որին ներկա էին քանդակագործի այրին, Էքս-ան-Պրովանսի քաղաքային խորհրդի անդամներ, լրագրողներ, ֆրանսահայ համայնքի ներկայացուցիչներ։

ՀՀ դեսպանը շնորհակալություն է հայտնել քաղաքապետ Ժուասենին հայ-ֆրանսիական բարեկամությանը նվիրվածության ու հայ ժողովրդի համար կենսական հարցերի նկատմամբ շարունակական մեծ ուշադրության, ի համերաշխություն հայ ժողովրդի՝ քաղաքային խորհրդի կողմից ընդունված բանաձևերի, ինչպես նաև ֆրանսահայ քանդակագործի աշխատանքների ցուցադրումը կազմակերպելու համար։ Անդրադարձել է Ադրբեջանի կողմից Լեռնային Ղարաբաղի ժողովրդի դեմ իրականացված էթնիկ զտմանը, դրա արդյունքում ստեղծված հումանիտար իրավիճակին, ինչպես նաև ՀՀ առջև ծառացած մարտահրավերներին։

Հասմիկ Տոլմաջյանը բարձր է գնահատել 2021թ․-ից ի վեր Հայաստանի Հանրապետության դրոշը՝ Ֆրանսիայի, Եվրոպական Միության, Էքս-ան-Պրովանս քաղաքի դրոշների կողքին, քաղաքապետարանի շենքի ճակատային հատվածում ծածանելու հանգամանքը։

Սոֆի Ժուասենը, արժևորել է 20-րդ դարի առաջին ցեղասպանության զոհերի ու վերապրածների ժառանգների մեծ ավանդն Էքս-ան-Պրովանս քաղաքի զարգացման գործում, դատապարտել Լեռնային Ղարաբաղում տեղի ունեցած վերջին զարգացումները, տասնամսյա շրջափակումից հետո Ադրբեջանի լայնածավալ ռազմական հարձակումը, որը հանգեցրել է ողբերգական հետևանքների՝ Արցախի Հանրապետության կազմալուծմանն ու ողջ հայ բնակչության բռնի տեղահանությանը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր