Հիշատակման արարողություն նվիրված ապրիլյան քառօրյա պատերազմի զոհերին

03 ապրիլի, 2017

Ապրիլի 1-ին, Հնչակյան կուսակցության երիտասարդական «Նազարբեկ» ընկերության նախաձեռնությամբ Ֆրանսիայի Ալֆորվիլ քաղաքի հայկական խաչքարի մոտ կազմակերպվեց ապրիլյան քառօրյա պատերազմի զոհերին նվիրված հիշատակման արարողություն: Միջոցառմանը ներկա էին Ֆրանսիայում ՀՀ դեսպան Վիգեն Չիտեչյանը, Ֆրանսիայում Արցախի ներկայացուցիչ Հովհաննես Գևորգյանը, Ալֆորվիլի քաղաքապետ, Սենատոր Լյուկ Կարվունասը, <Նազարբեկի> նախագահ Սևագ Սարիկայան, ինչպես նաև ֆրանսահայ համայնքային կառույցների ներկայացուցիչներ:

Միջոցառմանը ներկա պաշտոնյաները հուշարձանի մոտ զետեղեցին ծաղկեպսակներ և հանդես եկան ելույթներով:

Ալֆորվիլի քաղաքապետ, Սենատոր Լյուկ Կարվունասը, ոը բազմիցս այցելել է Արցախ, իր ելույթում պատրաստակամություն հայտնեց համագործակցության կապեր ստեղծել իր քաղաքի և Արցախի որևէ քաղաքի միջև:

Դեսպան Վիգեն Չիտեչյանն իր ելույթում մասնավորապես նշեց, որ 1994թ. հրադադարից հետո 2016թ. ապրիլյան հարձակումը ԼՂ հակամարտության ամենավտանգավոր էսկալացիան էր, որն ուղեկցվեց Ադրբեջանի կողմից միջազգային հումանիտար իրավունքի կոպիտ խախտումներով և ուղղված էր Արցախի ժողովրդին ահաբեկելուն: Միևնույն ժամանակ դեսպանը նշեց, որ Հայաստանը, որպես Արցախի անվտանգության երաշխավոր, ապահովելու է ԼՂ ժողովրդի անվտանգությունը և ԵԱՀԿ Մինսկի խմբի համանախագահ երկրների հետ շարունակելու է հիմնախնդրի բացառապես խաղաղ կարգավորմանն ուղղված ջանքերը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր