Դեսպան Չիտեչյանի այցը Թուլուզ

19 սեպտեմբերի, 2015

Սեպտեմբերի 18-19-ը տեղի ունեցավ Ֆրանսիայում ՀՀ դեսպան Վիգեն Չիտեչյանի աշխատանքային այցը Թուլուզ:

Այցի շրջանակներում՝ սեպտեմբերի 18-ին Ֆրանսիայում ՀՀ դեսպան Վիգեն Չիտեչյանի պատվավոր ներկայությամբ տեղի ունեցավ Թուլուզի հայկական մշակույթի կենտրոնի բացման հանդիսավոր արարողությունը` քաղաքապետ Ժան-Լյուկ Մուդենկի և Թուլուզի հայկական ընկերակցության նախագահ Ստեֆան Կոժայանի, տեղական իշխանության ներկայացուցիչների և հարյուրավոր հյուրերի մասնակցությամբ:

Դեսպան Չիտեչյանն իր ելույթում նշեց հայ ժողովրդի համար այս խորհրդանշական տարում Ֆրանսիայի խոշոր քաղաքներից մեկում հայկական մշակույթի կենտրոնի հիմնման կարևորությունը՝ արժանին մատուցելով Թուլուզի հայկական ընկերակցության բազմամյա ջանքերին և շնորհակալություն հայտնելով քաղաքային և տարածքային իշխանություններին՝ Թուլուզի հայերի հանդեպ ուշադրության և ցուցաբերած աջակցության համար:

Նորաբաց մշակույթի կենտրոնում կանցկացվեն պարբերական միջոցառումներ և կգործարկվի Միդի-Պիրենե մարզի և Թուլուզի հայկական ընկերակցության շաբաթօրյա Հայոց դպրոցը:

Սեպտեմբերի 19-ին Օտ-Գարոնն դեպարտամենտի խորհրդում տեղի ունեցավ ՀՀ դեսպանի հանդիպումը դեպարտամենտի նախագահ Ժորժ Մերիկի հետ:

Պաշտոնական հանդիպմանը հաջորդեց դեպարտամենտի խորհրդի տարածքում՝ ARAM հայկական հիշագրության կազմակերպության կողմից պատրաստված Հայոց ցեղասպանության մասին ցուցադրության բացման արարողությունը:

Նույն օրը դեսպան Չիտեչյանը Թուլուզի հայ ընկերակցության ղեկավար կազմի ուղեկցությամբ այցելեց Թուլուզի Միսակ Մանուշյան փողոցում գտնվող Մելինե Մանուշյանի անվան մայրերի աջակցության կենտրոն, որի հանդիսավոր բացումը նախատեսվում է նոյեմբերին: Այնուհետև տեղի ունեցավ ծաղկեպսակի զետեղում քաղաքի Հայաստանի հրապարակում Հայոց ցեղասպանության զոհերի հիշատակին նվիրված խաչքարին:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր