Հայոց ցեղասպանությանը նվիրված ցուցադրություն Փարիզի Հոլոքոստի հուշահամալիրում

02 ապրիլի, 2015

Ապրիլի 2-ին Փարիզի Հոլոքոստի հուշահամալիրում տեղի ունեցավ Հայոց ցեղասպանության 100-րդ տարելիցին նվիրված ցուցադրության բացման պաշտոնական արարողությունը՝ Ֆրանսիայում ՀՀ դեսպան Վիգեն Չիտեչյանի եւ հուշահամալիրի նախագահ Էրիկ դը Ռոթշիլդի գլխավորությամբ:

Նախքան պաշտոնական բացումը, դեսպան Չիտեչյանը հուշահամալիրի ղեկավարության հետ շրջեց ցուցասրահներով՝ ցուցադրության պատասխանատուներ, պատմաբան Իվ Տերնոնի եւ Կլեր Մուրադյանի ուղեկցությամբ: Այնուհետեւ

հուշահամալիրի ամֆիթատրոնում մեկնարկեց բացման արարողությունը, որին ներկա էին ֆրանսիացի քաղաքական գործիչներ, հետազոտողներ, լրագրողներ եւ հարյուրավոր հյուրեր: Բացման խոսքով հանդես եկան դեսպան Չիտեչյանը, Էրիկ դե Ռոթշիլդը, Իվ Տերնոնը եւ Կլեր Մուրադյանը:

Իր խոսքում դեսպան Չիտեչյանն ընդգծեց բացառիկ ցուցադրության կարեւորությունը՝ նախաձեռնության համար շնորհակալություն հայտնելով Հոլոքոստի հուշահամալիրի նախագահին եւ ցուցադրության պատասխանատու հետազոտողներին: Դեսպանն առանձնահատուկ արժեւորեց Հոլոքոստի հուշահամալիրի եւ Հայոց ցեղասպանության թանգարան-ինստիտուտի վերջին տարիներին հաստատված համագործակցությունը` գոհունակությամբ հայտնելով, որ մոտ ապագայում երկու հաստատությունների միջեւ հարաբերություններն էլ ավելի կխորանան՝ համագործակցության պայմանագրի կնքմամբ: «Մեր պայքարը քաղաքակրթական պայքար է: Մենք ելնում ենք այն սկզբունքից, որ այս աշխարհում մարդու առաքելությունը վայրագություններ իրականացնելու մեջ չէ: Մեր պայքարն ուղղված է մարդու պատկերի եւ առաքելության խեղաթյուրման դեմ: Պայքար, որի նպատակն է պաշտպանել մարդկային էությունն ու արժանապատվությունը», - ավարտեց իր խոսքը դեսպանը:

Բացման արարողության պաշտոնական մասի ավարտից հետո ցուցադրվեցին Ավրորա Մարդիգանյանի «Խոշտանգված Հայաստան» գրքի հիման վրա 1919թ. նկարահանված «Հոգիների աճուրդ» եւ պատմավավերագրական «Ցեղասպանության որբեր» ֆիլմերը:

Հայոց ցեղասպանությանը նվիրված ցուցադրությունը Հոլոքոստի հուշահամալիրում կշարունակվի մինչեւ սեպտեմբերի 27-ը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր