Հայոց ցեղասպանության 100-ամյակին նվիրված միջոցառումների հանդիսավոր մեկնարկը Ֆրանսիայի Սենտ-Էթյեն քաղաքում

18 փետրվարի, 2015

Փետրվարի 18-ին Ֆրանսիայի Սենտ-Էթյեն քաղաքի քաղաքապետարանում քաղաքապետ Գաել Պերդրոյի, Լիոնում ՀՀ գլխավոր հյուպատոսության ներկայացուցչի և շրջակա մի շարք քաղաքների քաղաքապետերի, տեղական պատգամավորների, մշակութային և լրագրողական շրջանակների բազմաթիվ ներկայացուցիների, ինչպես նաև հարյուրավոր ներկաների մասնակցությամբ տեղի ունեցավ Հայոց ցեղասպանության 100-ամյակին նվիրված միջոցառումների հանդիսավոր մեկնարկը:

Բացման խոսքով հանդես եկան Սենտ-Էթյենի քաղաքապետը, Լուար նահանգի պատգամավոր Ֆրանսուա Ռոշըբլուանի ներկայացուցիչը, Լիոնում ՀՀ գլխավոր հյուպատոսության ներկայացուցիչը, Ցեղասպանության հարյուրամյակի միջոցառումների տարածքային պատասխանատուն, Լուար նահանգի հայկական կազմակերպությունների միության նախագահը:

Սենտ-Էյենի քաղաքապետը իր ելույթում հայտնեց մոտ ապագայում քաղաքային խորհրդի կողմից Հայոց ցեղասպանության 100-ամյակի կապակցությամբ ուղերձ ընդունելու իր առաջարկի մասին:

Միջոցառումը մեկնարկեց Ազնավուրի ՛՛Նրանք ընկան՛՛ երգով, այնուհետև ՛՛1915-2015՛՛ տեսանյութի ցուցադրմամբ: Հանդիսավոր արարողությունը եզրափակվեց Հայաստանի և Ֆրանսիայի ազգային օրհներգերով:

Սենտ-Էթյենի քաղաքապետարանում Հայոց ցեղասպանության 100-ամյակին նվիրված միջոցառումների հանդիսավոր մեկնարկի հետ միաժամանակ Հայոց ցեղասպանության թանգարան-ինստիտուտի աջակցությամբ քաղաքապետարանում մինչև մարտի 3-ը քաղաքի բնակիչներին և հյուրերին կներկայացվի «Հայոց ցեղասպանությունը ֆրանսիական և օտարերկյա մամուլի առաջին էջերում» խորագրով ցուցահանդեսը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր