Փարիզում Ֆրանսիայի նախագահի մասնակցությամբ մեկնարկ է տրվել Հայոց Ցեղասպանության Հարյուրամյակի միջոցառումների ծրագրին

28 հունվարի, 2015

Հունվարի 28-ին Փարիզում տեղի ունեցավ Ֆրանսահայ կազմակերպությունների համակարգող խորհրդի (CCAF) ամենամյա հանդիսավոր ընթրիքը, որն առաջին անգամ անցկացվեց Ֆրանսիայի նախագահի` Ֆրանսուա Օլանդի մասնակցությամբ:

Նախագահին ուղեկցում էին Ֆրանսիայի կառավարության անդամներ` Եվրոպական հարցերով պետքարտուղար Արլեմ Դեզիրը և Նախկին ռազմիկների և հիշատակի պետքարտուղար Ժան-Մարկ Տոդեսկինին, Փարիզի քաղաքապետ Անն Իդալգոն:

Հրավիրյալների շարքում էին Ֆրանսիայում ՀՀ դեսպան Վիգեն Չիտեչյանը, մեծն հայ շանսոնյե Շառլ Ազնավուրը, Ֆրանսիայի պետական և տեղական իշխանությունների բարձրաստիճան ներկայացուցիչներ, պատգամավորներ, սենատորներ, ֆրանսահայ երևելի անհատներ, ֆրանսահայ կազմակերպությունների ղեկավարներ և հոգևոր հայրեր:

Ֆրանսիայի նախագահը հանդես եկավ պաշտոնական ելույթով, որում մասնավորապես կոչ արեց թուրքական իշխանություններին ջանքեր գործադրել ճշմարտությանը առերեսվելու ուղղությամբ և հույս հայտնեց, որ Հայոց Ցեղասպանության հարյուրերորդ տարելիցը իրողության ճանաչման ճանապարհի նոր փուլեր անցնելու և գործընթացին նոր շունչ տալու առիթ կհանդիսանա: Խոսելով Հայոց ցեղասպանության ժխտողականության մասին նախագահ Օլանդն ընդգծեց. «Խոսքի ազատությունը, որ մենք ամեն գնով ցանկանում ենք պաշտպանել, երբեք չպետք է իրողության խեղաթյուրման միջոց դառնա» և այն «չի հանդուրժի երբեք մարդկության դեմ ուղղված հանցագործության արդարացումներ»:

Արցախյան հակամարտության առնչությամբ նախագահ Օլանդը հայտնեց, որ Ֆրանսիան չի հանձնվելու և շարունակելու է իր ջանքերը հակամարտության խաղաղ կարգավորման ուղղությամբ:

Ֆրանսուա Օլանդն իր ելույթում նաև վերահաստատեց այս տարի ապրիլի 24-ին Երևան այցելելու և Հայոց Ցեղասպանության զոհերի հիշատակին Ֆրանսիայի անունից հարգանքի տուրք մատուցելու իր որոշումը:

«Այսօր, երբ մեր երկիրը դարձել է բարբարոսության, անհանդուրժողականության, ատելության, ահաբեկչության թիրախ, դուք՝ Ֆրանսիայի հայեր, արժանապատվության օրինակ եք տալիս մեզ բոլորիս, ինչը ձեր և մեր բոլորիս հպարտությունն է», ավարտեց իր ելույթը Ֆրանսիայի նախագահը:

Ելույթներով հանդես եկան CCAF համանախագահներ Արա Թորանյանը, Մուրադ Փափազյանը և Հայոց Ցեղասպանության Հարյուրամյակի հանձնախմբի ղեկավար Ալեքսի Գովցյանը: Միջոցառման ընթացքում մեծն շանսոնյե Շառլ Ազնավուրը պարգևատրվեց «CCAF Արիության շքանշանով»:

Այնուհետև Հայոց Ցեղասպանության Հարյուրամյակի հանձնախմբի (Mission 2015) կողմից հյուրերին ներկայացվեց Հայոց Ցեղասպանության Հարյուրամյակի հիշատակի միջոցառումների լայնածավալ ծրագիրը, որը 2015թ. ողջ ընթացքում իրականացվելու է Ֆրանսիայի հարյուրավոր քաղաքներում:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր