«Դպրոցասեր» հայկական կրթօջախի նախակրթարանի բացման արարողություն

24 հունվարի, 2015

Հունվարի 24-ին Փարիզի մերձակայքում գտնվող Լը Ռենսի քաղաքում տեղի ունեցավ «Դպրոցասեր» հայկական կրթօջախի նախակրթարանի նոր շենքի բացման հանդիսավոր արարողությունը: Միջոցառմանը մասնակցեցին մի շարք ֆրանսիացի պաշտոնյաներ, պատգամավորներ, քաղաքապետեր, Ֆրանսիայում ՀՀ դեսպանության և հայ հոգևորականության ներկայացուցիչներ և հարյուրավոր ֆրանսահայեր:

Հայ Առաքելական Եկեղեցու Ֆրանսիայի թեմի առաջնորդ Վահան եպիսկոպոս Հովհաննեսյանը և Սեն Սեն-Դընի շրջանի պրեֆեկտ Ֆիլիպ Գալլին, Լը Ռենսիի և Լիվրի-Գարգանի քաղաքապետեր Ժան-Միշել Ժընեստիեի և Պիեր-Իվ Մարտենի հետ միասին կտրեցին նորակառույց նախակրթարանի կարմիր ժապավենը:

Այնուհետև տեղի ունեցավ նախակրթարանի բակում տեղադրված խաչքարի օծման արարողությունը: Ներկաները ծաղկեպսակներ զետեղեցին Հայոց ցեղասպանության անմեղ զոհերի հիշատակին նվիրված հուշարձանին:

Նախակրթարանի հանդիսությունների սրահում ելույթներով հանդես եկան ներկա բարձրաստիճան հյուրերը: Դպրոցի տնօրինությունն ընթերցեց բացման կապակցությամբ ՀՀ Սփյուռքի նախարար Հրանուշ Հակոբյանի ուղերձը: ՀՀ դեսպանության ներկայացուցիչն իր ելույթում խորհրդանշական համարեց այն փաստը, որ Հայոց Ցեղասպանության հիշատակի հարյուրերորդ տարին սկսվում է ֆրանսահայ մանուկների համար նախակրթարանի բացմամբ՝ ինչը նախնիների հիշատակը հարգելու լավագույն միջոցն է:

Ելույթների ավարտից հետո հյուրերը «Դպրոցասերի» տնօրինության ուղեկցությամբ այցելեցին հաստատության նորակառույց շենքի սրահները:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր