Ֆրանսիայի քաղաքներում շարունակվում են Հայոց Ցեղասպանության 99-ամյակին նվիրված միջոցառումները

27 ապրիլի, 2014

Ապրիլի 26-27-ին Ֆրանսիայի մի քանի տասնյակ քաղաքներում շարունակվեցին Հայոց Ցեղասպանության 99-ամյակին նվիրված միջոցառումները:
Ապրիլի 26-ին Ֆրանսիայում ՀՀ դեսպան Վիգեն Չիտեչյանը Մեդոնի քաղաքապետ, Ֆրանսիայի ԱԺ պատգամավոր Էրվե Մարսելի հրավերով ներկա գտնվեց քաղաքի կենտրոնական հրապարակում անցկացվող հարգանքի տուրքի արարողությանը:

Միջոցառմանը ներկա գտնվեցին Իլ դը Ֆրանս շրջանի պատգամավորներ, սենատորներ, քաղաքային իշխանությունների ներկայացուցիչներ, Մեդոնի բազմաթիվ բնակիչներ: Ներկաների կողմից Մեդոնի հայկական հուշակոթողի առջեւ զետեղվեցին ծաղկեպսակներ, հնչեցին Հայաստանի եւ Ֆրանսիայի օրհներգերը:

Նույն օրը Պլեսիս-Ռոբինսոն քաղաքի Ազատության պուրակում տեղի ունեցավ Հայոց Ցեղասպանության զոհերի ոգեկոչման արարողություն: Միջոցառման ընթացքում կատարվեց Երևանի Արաբկիր համայնքի կողմից Պլեսիս-Ռոբինսոնին նվիրված խաչքարի հանդիսավոր բացումը քաղաքապետ Ֆիլիպ Պեմզեկի կողմից, որին մասնակցեցին տեղական ինքնակառավարման մարմինների, Երևանի Արաբկիր համայնքի, Ֆրանսիայում ՀՀ դեսպանության ներկայացուցիչներ և հարյուրավոր հյուրեր:

Ապրիլի 27-ին Իսի-լե-Մուլինոյի հայկական եկեղեցում Հայոց Ցեղասպանության զոհերի հիշատակին մատուցված պատարագից հետո քաղաքային իշխանությունների ներկայացուցիչներն ու հարյուրավոր ֆրանսահայեր Իսի-լե-Մուլինոյի քաղաքապետ, Ֆրանսիայի ԱԺ պատգամավոր Անդրե Սանտինիի, Ֆրանսիայում ՀՀ դեսպան Վիգեն Չիտեչյանի և Հայ առաքելական եկեղեցու ֆրանսահայ թեմի առաջնորդական տեղապահ Մեսրոպ վարդապետ Պարսամյանի գլխավորությամբ քայլերթ կատարեցին Իսի-լե-Մուլինո քաղաքի կենտրոնական փողոցներով դեպի քաղաքի հայկական հուշակոթող, որի մատույցներում տեղի ունեցավ ծաղկեպսակների զետեղման արարողությունը:

Ապրիլի 26-27-ին Հայոց Ցեղասպանության 99-ամյակին նվիրված միջոցառումներ անցկացվեցին նաև Ռենսի, Անիեր-Սյուր-Սեն, Առնուվիլ, Սեվրան, Շավիյ, Վիեն, Շաս-սյուր-Ռոն, Առլ, Ավինյոն, Կաբրիես, Լե Պենն Միրաբո, Լ՛Իլ սյուր լա Սորգ, Մոնպելիեր, Բեզեկ-կապ-Սիզյուն, Գապ քաղաքներում:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր