Մանուշյանի խմբի հիշատակին նվիրված միջոցառումներ անցկացվեցին Իսի-լե-Մուլինոյում և Փարիզի 20-րդ թաղամասում:

21 փետրվարի, 2014

Փետրվարի 21-ին Իսի-լե-Մուլինո քաղաքի Մանուշյան խմբի հրապարակում կայացավ Ֆրանսիական Դիմադրության շարժման մասնակից Միսաք Մանուշյանի և նրա խմբի անդամների` նացիստների կողմից գնդակահարման 70-րդ տարելիցին նվիրված միջոցառում, որին ներկա գտնվեցին Իսի-լե-Մուլինոյի քաղաքապետ Անդրե Սանտինին, Ֆրանսիայում Հայաստանի դեսպան Վիգեն Չիտեչյանը, Իլ-դը-Ֆրանսի տեղական ինքնակառավարման մարմինների ներկայացուցիչներ և հարյուրավոր ֆրանսիացիներ:

Միջոցառմանը ներկա գտնվեց և ելույթով հանդես եկավ Մանուշյանի խմբի անդամ, 97-ամյա Արսեն Չաքըրյանը՝ պատմելով ներկաներին նացիստական ուժերի դեմ խմբի գործողությունների մասին իր հիշողությունները: Այնուհետև ներկաները ծաղկեպսակներ զետեղեցին Միսաք Մանուշյանի կիսանդրուն:

Նույն օրը Փարիզի 20-րդ թաղամասում կայացավ հավաք Միսաք Մանուշյանի որմնանկարի ներքո՝ Փարիզի երկու փոխքաղաքապետերի, Ֆրանսիայում Հայաստանի դեսպանորդի, քաղաքային իշխանությունների ներկայացուցիչների և ֆրանսահայ նախկին ռազմիկների միության անդամների ներկայությամբ: Միջոցառման հարյուրավոր մասնակիցները դրոշակակիրների ուղեկցությամբ քայլերթ կատարեցին դեպի Միսաք Մանուշյանի փողոց, որտեղ ելույթով հանդես եկավ Փարիզի 20-րդի թաղապետ տիկին Կալանդրան:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր