Փարիզում տեղի ունեցավ Ֆրանսահայ անվանի աստղագետ Հակոբ Թերզանին Անանիա Շիրակացու մեդալի հանդիսավոր հանձնումը

20 հունվարի, 2014

Հունվարի 20-ին Ֆրանսիայում Հայաստանի դեսպան Վիգեն Չիտեչյանը ֆրանսահայ աստղագետ Հակոբ Թերզանին հանդիսավոր արարողությամբ հանձնեց ՀՀ Նախագահ Սերժ Սարգսյանի կողմից վերջինիս շնորհված Անանիա Շիրակացու մեդալը:

Դեսպան Չիտեչյանը, շնորհավորելով պրոֆեսոր Թերզանին, հպարտությամբ ընդգծեց հայազգի գիտնականի բացահայտումների կարևորությունը աստղագիտության բնագավառում՝ բարձր գնահատելով վերջինիս մշտական կապը Մայր Հայրենիքի հետ և տասնամյակների մասնագիտական համագործակցությունը Բյուրականի աստղադիտարանի հետ:

Հակոբ Թերզանը, որը հանդիսանում է Փարիզի Գիտություններ ակադեմիայի լաուրեատ և «Ազգային արժանիքի ասպետ» շքանշանակիր, իր շնորհակալական խոսքում նշեց, որ միջնադարյան հայ մեծ գիտնական Անանիա Շիրակացու անունը կրող պարգև ստանալը մեծ հպարտություն է իր համար:

Հակոբ Թերզանի բացահայտումների շարքում են 4430 աստղ, 11 գնդային աստղաբույլ, 158 միգամածություն և 124 գալակտիկա: Վերջինիս աշխատություններն ու կատարած բացահայտումները իրենց ուրույն տեղն ունեն ոչ միայն ֆրանսիական այլև համաշխարհային աստղագիտության զարգացման մեջ:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր