Վիգեն Չիտեչյանի ուղերձը Հայաստանում տեղի ունեցած երկրաշարժի 25-րդ տարելիցի կապակցությամբ

07 դեկտեմբերի, 2013

Հարգելի հայրենակիցներ,
Հարգելի ֆրանսիացի բարեկամներ,

Հայաստանում տեղի ունեցած երկրաշարժից անցել է 25 տարի: Մեր երկիրն ապրեց խորը ողբերգություն, այդ աղետի հետևանքով զոհվեցին տասնյակ հազարավոր մեր հայրենակիցներ, հարյուր հազարավորները մնացին անօթևան, ամբողջովին ավերվեցին քաղաքներ և գյուղեր:

Հայ ժողովուրդը, անշուշտ, չի մոռանա այդ ցավը, բայց միևնույն ժամանակ նա երբեք չի մոռանա ողջ աշխարհից օգնության հասած երկրների և մարդկանց աջակցությունն ու համերաշխությունը:

Այսօր մենք հիշում ենք փրկարաների առաջին խմբերին: Օգնության եկած այդ առաջին խմբերի մեջ անշուշտ կային մեր ֆրանսիացի բարեկամները և նրանց հետ առաջին շարքերում էին հայազգի մեր քույրերն ու եղբայրները: Նրանց արհեստավարժությունը տպավորիչ էր և մեծ հույս էր ներշնչում: Այդ աննախադեպ միջազգային համերաշխությունը մեզ մեծ ուժ տվեց:

25 տարի անց, մենք կրկին խոնարհվում ենք բոլոր այն անձանց և երկրների առջև, որոնք հայ ժողովրդին մենակ չթողեցին այդ փորձության մեջ:

25 տարի առաջ, միջազգային համերաշխությունն ու օգնությունը ոչ միայն եկան ամոքելու երկրաշարժի վերքերը, այլև, մեր ընկալմամբ՝ սատարելու ազատության և անկախության մեր պայքարին:

Այն ժամանակ ապրելով փակ համակարգում՝ մենք սկսել էինք բացվել դեպի արտաքին աշխարհ և մերձենալ մարդասիրության, ազատության և ժողովրդավարության բարձր արժեքներին, որոնք մենք լիարժեքորեն կիսում ենք:

Այսօր մենք ազատ և ժողովրդավար Հայաստանի կառուցման ճանապարհին ենք, մենք կառուցում ենք երկիր, որը կկարողանա ապահովել իր ժողովրդի խաղաղությունն ու բարգավաճումը, երկիր, որն իր տեղը կունենա ժողովուրդների մեծ ընտանիքում և իր ներդրումը կբերի համընդհանուր առաջընթացին:

Դա լավագույն ձևն է շնորհակալություն հայտնելու աշխարհի ժողովուրդներին Հայաստանին ցուցաբերած աջակցության համար: Դա նաև լավագույն ձևն է հարգանքի տուրք մատուցելու երկրաշարժի զոհերի հիշատակին:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր