Ֆրանսիայում ՀՀ դեսպան Վիգեն Չիտեչյանի ուղերձը Անկախության տոնի կապակցությամբ

21 սեպտեմբերի, 2013

Այսօր սեպտեմբերի 21-ին, մենք տոնում ենք նորանկախ հազարամյա Հայաստանի 22-րդ տարեդարձը: Տարեդարձ, որը առիթ է հետադարձ հայացք ձգելու անցած` ոչ այնքան դյուրին 22 տարիներին:

Հիշենք թե ինչպես սկսեցինք, իրողությունները մեր երկրի ներսում և մեր հարևանությամբ.

Հայաստանը կիսով չափ ավերված էր ահավոր երկրաշարժի հետևանքով, որը նաև տասնյակ հազարավոր կյանքեր խլեց,
Խորհրդային Միությունը փլուզվել էր` դրան հետևած տնտեսական, ֆինանսական և սոցիալական հետևանքներով,
մեր մի հարևանը որոշել էր օգտվել խառնաշփոթ իրավիճակից` փորձելով իրենց հայրենիքից վտարել մեր քույրերին ու եղբայրներին և նրանց պարտադրեց լայնամասշտաբ պատերազմ,
մյուս հարևանը փակեց իր սահմանները` պարտադրելով շրջափակում,
երկիրն էներգետիկ խորը ճգնաժամի մեջ էր հայտնվել, որը, սննդի ու առաջին անհրաժեշտության իրերի պակասի հետ մեկտեղ, հավասարազոր էր գոյատևման համար ամենօրյա պայքարի:

Իրապես, Հայաստանն իր ճանապարհը սկսեց գոյատևման համար մեծ մարտահրավերով: Սակայն, այն փաստը, որ վերջապես իրականացել էր հայ ժողովրդի բազում սերունդների երազանքը, մեզ տվեց ուժ ու եռանդ` շարունակելու հայոց պետության ամրապնդման ճանապարհը:

Մեր ազգի խիզախության, տոկունության և ստեղծագործ ոգու շնորհիվ, մենք կարողացանք ապահովել Լեռնային Ղարաբաղի անվտանգությունը, վերակառուցել աղետի գոտին, հաղթահարել էներգետիկ ճգնաժամը, շատ բարդ պայմաններում վերագործարկեցինք ատոմակայանը և ստեղծեցինք էներգիայի այլընտրանքային աղբյուրներ, շարունակական շրջափակման պայմաններում գտանք մեր արտադրանքն արտահանելու ոչ ավանդական ուղիներ, զարգացրեցինք և կառուցեցինք ճանապարհային ցանցը ողջ երկրի տարածքով: Զուգահեռաբար մենք ապահովեցին մեր շուկայի ազատականացումը, սոցիալական և հասարակական կառույցների ժողովրդավարեցումը, ամրապնդեցինք իրավական պետությունը, մարդու իրավունքների պաշտպանությունը, բոլոր այն արժեքները, որոնք մենք կիսում ենք բարի կամքի պետությունների և ժողովուրդների մեծ ընտանիքի հետ:

Այս ճանապարհին, բարեկամ երկրների, ինչպես Ֆրանսիան է, ինչպես նաև հայկական արմատներով մեր քույրերի և եղբայրների աջակցությունը շատ կարևոր էր մեզ համար;

Այսօր Հայաստանն անկախ է, բայց պայքարը դեռ չի ավարտվել: Ընդհակառակը, մենք թևակոխել ենք մեր ազգային նպատակների իրականացման նոր փուլ. դա մեր ազգի բարեկեցությունը, մեր պետության առաջընթացն ու զարգացումն ապահովելու նպատակն է:

Մեր գոյության հազարամյակների ընթացքում, հայկական պետականությունն ունեցել է տարբեր պատմական փուլեր, որոնցից յուրաքանչյուրը եզակի է իր պատմական միջավայրով և ապագայի տեսլականով: Նորանկախ Հայաստանի 22 տարիների ընթացքում, որը նույնպես բացառիկ ժամանակաշրջան է, մենք առաջ ենք շարժվում բավական բարդ պայմաններում, միգուցե ոչ այնքան արագ որքան կցանկանայինք, բայց այնուամենայնիվ` հաստատակամորեն և ճիշտ ուղությամբ` հանուն մեր ազգի բարեկեցության և մեր երկրի հարատևման:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր