Հայոց Ցեղասպանության զոհերի հիշատակին նվիրված միջոցառումներ Իսի-լե-Մուլինո և Կլամար քաղաքներում

29 ապրիլի, 2013

Ապրիլի 28-ին Ֆրանսիայում Հայաստանի դեսպան Վիգեն Չիտեչյանը մասնակցեց Փարիզի մերձակա Իսի-լե-Մուլինո և Կլամար քաղաքներում Հայոց Ցեղասպանության 98-րդ տարելիցին նվիրված միջոցառումներին:

Իսի-լե-Մուլինոյի հայկական եկեղեցում մատուցվեց պատարգ, որի ավարտին քաղաքային իշխանությունների ներկայացուցիչներն ու հարյուրավոր ֆրանսահայեր դեսպան Չիտեչյանի, քաղաքապետ Անդրե Սանտինիի, շրջանը ներկայացնող սենատորների և պատգամավորների գլխավորությամբ և ֆրանսահայ նախկին ռազմիկների միության դրոշակակիրների ուղեկցությամբ քայլերթ կատարեցին Իսի-լե-Մուլինո քաղաքի կենտրոնական փողոցներով դեպի քաղաքի հայկական հուշակոթող, որի մատույցներում տեղի ունեցավ ծաղկեպսակների զետեղման արարողությունը:

Արարողության ընթացքում հայ եկեղեցիների հոգևոր այրերը աղոթք հնչեցրեցին, իսկ այնուհետ ելույթներ ունեցան ՀՀ դեսպանը, Իսի-լե-Մուլինոյի քաղաքապետը և ֆրանսահայ երիտասարդական կառույցների ներկայացուցիչները: Երիտասարդներն իրենց խոսքում վստահեցրեցին, որ նոր սերունդն ավելի քան վճռական է տրամադրված Հայոց Ցեղասպանության ժխտողականության դեմ պայքարին:

Ֆրանսիայ ԱԺ պատգամավոր և Իսի-լե-Մուլինոյի քաղաքապետ Անդրե Սանտինին, ընդգծելով Հայոց Ցեղասպանության ժխտման քրեականացման կարևորությունը, նշեց, որ անընդունելի է, որ Ֆրանսիայում լինի քաղաքացիների մի խումբ ում հիշողությունը վիրավորելը կարող է անպատիժ մնալ:

Նույն օրը հիշատակի միջոցառում անցկացվեց Կլամար քաղաքի հայկական խաչքարի մոտ, ծաղկեպսակների զետեղման արարողությանը հաջորդեցին ՀՀ դեսպանի և Կլամարի քաղաքապետ, սենատոր Ֆիլիպ Կալտենբախի ելույթները: Ֆրանսիայի Սենատի անդամը, որը նաև Սենատում Հայաստանի հետ բարեկամության խմբի նախագահն է, վերահաստատելով իր բարեկամությունը հայ ժողովրդի հանդեպ, համոզմունք հայտնեց, որ Ֆրանսիայի Նախագահի խոստման համաձայն` Հայոց Ցեղասպանության ժխտողականության դեմ օրենսդրական պայքարը հաջողությամբ պետք է պսակվի մոտ ապագայում:

Ապրիլի 27-28-ին Հայոց Ցեղասպանության զոհերի հիշատակին նվիրված միջոցառումները անցկացվեցին նաև Պլեսի-Ռոբինսոն, Առնուվիլ, Անտոնի, Շավիլ, Սեվրան, Շաս-սյուր-Ռոն, Մեյզիո, Վիեն, Արլ, Ավինյոն, Իլ սյուր լա Սորգ, Լե Պեն Միրաբո, Վիտրոլ, Լիոն, Կաբրի-Կալա, Մոնպելիե և Դեսին քաղաքներում:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր