Հարգանքի տուրք Փարիզում` Մանուշյանի խմբի անդամների գնդակահարության 69-րդ տարելիցի կապակցությամբ

24 փետրվարի, 2013

Փետրվարի 20-ին Փարիզում գտնվող Բանակի հրեական սինագոգում տեղի ունեցավ Ֆրանսիայի հերոս Միսաք Մանուշյանի խմբի 23 անդամների գնդակահարության 69-րդ տարելիցին նվիրված հիշատակի երեկո, որին ներկա էին հայ և հրեական համայնքային կազմակերպությունների, հոգևորականության և դեսպանության ներկայացուցիչներ: Սա արդեն երրորդ տարին է, ինչ Ֆրանսիայի հայ և հրեա համայնքները համատեղ են անցկացնում նացիստական օկուպացիայից Ֆրանսիայի ազատագրման համար զոհված հերոսների հիշատակի միջոցառումը:

Բանակի սինագոգի լեփ լեցուն դահլիճում հնչեցին հայ և հրեական աղոթքներ և հոգևորական տաղեր, իսկ այնուհետ ելույթ ունեցան Հայ նախկին ռազմիկների եւ դիմադրականների միության նախագահ Անտուան Բաղդիկյանը և Բանակի Րաբունապետ Հայիմ Կորսիան: Բանախոսներն ընդգծեցին ցեղասպանության զոհ դարձած հայ և հրեա ժողովուրդների միասնության կարևորությունը, ինչպես նաև մարդկության դեմ ուղղված հանցագործությունների ճանաչման և կանխարգելման գործում հատուկ առաքելությունը:

Փետրվարի 24-ին Փարիզի Իվրի գերեզմանատանը կայացավ Միսաք Մանուշյանի շիրիմին ծաղկեպսակների տեղադրման արարողությունը, որին ևս մասնակցեցին մեծ թվով հայ և հրեական համայնքների ներկայացուցիչներ, ինչպես նաև Հայաստանի դեսպանության անձնակազմի անդամներ:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր