Պարգևատրման արարողություն Ֆրանսիայում Հայաստանի դեսպանությունում

08 դեկտեմբերի, 2012

Դեկտեմբերի 8-ին Փարիզում ՀՀ դեսպանությունում ՀՀ արտաքին գործերի նախարար Էդվարդ Նալբանդյանի մասնակցությամբ կայացավ Փարիզի ճարտարապետության ակադեմիայի անդամ Սիլվի Կլավելին և Ճարտարապետների հայկական միության համահիմնադիր Ալեն Դարոնյանին Անանիա Շիրակացիու մեդալների հանդիսավոր հանձնման արարողությունը:

Արարողությանը ողջույնի խոսքով հանդես եկավ Ֆրանսիայում ՀՀ դեսպան Վիգեն Չիտեչյանը: ՀՀ Նախագահի ս.թ. մայիսի 23-ի հրամանագրով շնորհված մեդալները ճարտարապետներին հանձնեց ՀՀ արտաքին գործերի նախարար Էդվարդ Նալբանդյանը:

Սիլվի Կլավելը և Ալեն Դարոնյանը Հայաստանի անկախության առաջին իսկ տարիներից նախաձեռնել և մասնակցել են հայ և ֆրանսիացի ճարտարապետների համագործակցության զարգացմանն ուղղված բազմաթիվ միջոցառումների, երկու երկրների միջև ճարտարապետների դիպլոմների փոխադարձ ճանաչմանը, 1988թ. Սպիտակի ավերիչ երկրաշարժի հետևանքների վերացմանն ուղղված աշխատանքներին, ինչպես նաև ակտիվ ներգրավվածություն ունեցել 2010թ. Ֆրանսիայում Հայաստանի տարվա անցկացմանը` նախաձեռնելով «Հայաստանի 12 մայրաքաղաքները» ցուցահանդեսը Փարիզում, Մարսելում, իսկ այնուհետև նաև Բրյուսելում և Ժնևում:

Պարգևատրմանը ներկա էին Երևանի գլխավոր ճարտարապետ Նարեկ Սարգսյանը, Հայաստանում Ֆրանսիայի նախկին դեսպան Սերժ Սմեսովը, ֆրանսիացի և ֆրանսահայ անվանի ճարտարապետներ, ֆրանսահայ համայնքի երևելի անդամներ, մշակութային և հոգևորական գործիչներ:

Ծանոթագրություն. Անանիա Շիրակացու մեդալը շնորհվում է ՀՀ Նախագահի հրամանագրով` տնտեսության, ճարտարագիտության, ճարտարվեստի, գիտության ու տեխնիկայի բնագավառներում ակնառու գործունեության, նշանակալի գյուտերի եւ հայտնագործությունների համար:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր