Խոշորագույն երկրների ղեկավարները շնորհավորում են Հայաստանին Ազգային տոնի կապակցությամբ

21 սեպտեմբերի, 2012

Թերթերը հրապարակել են Նախագահներ Օլանդի, Օբամայի և Պուտինի, ՄԱԿ-ի Գլխավոր Քարտուղարի և միջազգային այլ առաջնորդների ուղերձները:

Նախագահ Օլանդն իր ուղերձում համարում է, որ Հայաստանը կարող է հպարտ լինել անկախությունից ի վեր իր անցած ուղով և դեպի ժողովրդավարություն ու բարգավաճում արձանագրած առաջընթացով՝ միաժամանակ ամրապնդելով իր դիրքերը միջազգային հարթակում: Ֆրանսիայի Նախագահը պատրաստակամություն է հայտնել շարունակել քսան տարի առաջ սկիզբ առած առաքելությունը, այն է՝ հայ-ֆրանսիական հարաբերությունների զարգացումը բոլոր ոլորտներում և ողջունում է Հայաստանի Նախագահի կամքը շարունակելու Լեռնային-Ղարաբաղի հակամարտության լուծմանն ուղղված բանակցությունների գործընթացը: Նախագահ Օլանդը գոհունակություն է հայտնում Հայաստանի Նախագահին առաջիկայում Փարիզում ընդունելու հեռանկարի կապակցությամբ:

Նախագահ Օբաման, իր հերթին, խոստանում է աջակցություն ցուցաբերել Հայաստանի կառավարության քաղաքական և տնտեսական բարեփոխումներին և գնահատում է Հայաստանի մասնակցությունը Աֆղանստանում և Կոսովոյում ռազմական գործողություններին: Պետքարտուղար Քլինթոնը նույնպես ուղերձ է հղել Հայաստանի Նախագահին:

Նախագահ Պուտինը պատրաստակամություն է հայտնում ընդլայնել ԱՊՀ և ՀԱՊԿ ինտեգրման մեխանիզմների շրջանակներում երկու երկրների միջև արդյունավետ փոխգործակցությունը՝ ի նպաստ Հայաստանի և Ռուսաստանի քաղաքացիների շահերի:

Սեպտեմբերի 21-ի` Հայաստանի անկախության տոնի կապակցությամբ, Փարիզում ՀՀ Դեսպանը բազմաթիվ շնորհավորական ուղերձներ է ստացել Ֆրանսիական Հանրապետության բարձրագույն դիվանագիտական, ինչպես նաև քաղաքական, տնտեսական և մշակութային ոլորտների ներկայացուցիչների կողմից:

Քաղվածք Հայաստանում Ֆրանսիայի դեսպանության 2012թ. սեպտեմբերի 24-ի մամուլի տեսությունից:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր