Ֆրանսիայում ՀՀ դեսպան Վ. Չիտեչյանի հանդիպումը Մարսելի քաղաքապետ, Ֆրանսիայի Սենատում մեծամասնություն կազմող <Միություն հանուն ժողովրդական շարժման> խմբակցության նախագահ Ժան-Կլոդ Գոդենի

19 սեպտեմբերի, 2011

2011 թ. սեպտեմբերի 19-ին, Հայաստանի Հանրապետության 20-ամյա հոբելյանի տոնակատարությունների շրջանակներում, Ֆրանսիայում ՀՀ դեսպան Վիգեն Չիտեչյանը Մարսելում հանդիպում ունեցավ Մարսելի քաղաքապետ, Ֆրանսիայի Սենատում մեծամասնություն կազմող Նախագահական <Միություն հանուն ժողովրդական շարժման> խմբակցության նախագահ Ժան-Կլոդ Գոդենի հետ: Քննարկվեց տեղի հայ համայնքի խնդիրներին, երկկողմ առևտրատնտեսական հարաբերություններին և ապակենտրոնացված համագործակցությանն առնչվող հարցերի լայն շրջանակ:
Նույն օրը դեսպան Չիտեչյանը մասնակցեց Հայաստանի Հանրապետության անկախության հռչակման 20-ամյա հոբելյանի կապակցությամբ Մարսելի Ֆարո պալատի Էժենի սրահում տրված հանդիսավոր ընթրիքին, որին մասնակցում էին շուրջ 300 հրավիրյալներ, այդ թվում` Մարսելի փոխքաղաքապետներ, Ազգային Ժողովի և շճջանային խորհրդի պատգամավորներ, գրողներ, երաժիշտներ: Կազմակերպիչներն էին Մարսել-Հայաստան միությունը և Մարսելի Ֆրանս-հայկական առևտրաարդյունաբերական պալատը: Նշանակալի երևույթ էր հայտնի գրողների, երգիչ-կատարողների, հումորիստների ներկայությունը, որոնք իրենց ելույթներում իրենց կապվածությունն արտահայտեցին Հայաստանի հանդեպ: Ներկաներին ուղղված ողջույնի ելույթով հանդես եկավ Ֆրանսիայում ՀՀ դեսպան Վիգեն Չիտեչյանը: Միջոցառումից հավաքագրված ողջ հասույթը տրամադրվելու էր Ֆրանսիայում Համահայկական Հիմնադրամի մասնաճյուղին: Հանդիսավոր ընթրիքն ավարտվեց տոնական ճոխ համերգ-ներկայացմամբ, որին իրենց կատարումներով մասնակցեցին Պատրիկ Ֆիորին, Նունե Եսայանը, երգի-պարի համույթներ, Մարսելի Սահակ-Մեսրոպ երգչախումբը` Խաչիկ Յիլմազյանի ղեկավարությամբ, հումորիստներ Պասկալ Լեգիտիմուսն ու Մաթիո Մադենյանը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր