Դեսպան Խաչատրյանը հանդիպել է Ֆրանսիայի ԱԺ-ում Ֆրանսիա-Հայաստան բարեկամության խմբի անդամների հետ

26 հունիսի, 2025

Հունիսի 25-ին Ֆրանսիայի Ազգային ժողովում կայացել է Ֆրանսիայում Հայաստանի դեսպան Արման Խաչատրյանի հանդիպումը ԱԺ Ֆրանսիա-Հայաստան բարեկամական խմբի անդամների հետ։

Հանդիպմանը դեսպան Խաչատրյանը երախտագիտություն է հայտնել Ֆրանսիայի Ազգային ժողովին և պատգամավորներին Հայաստանին և հայ ժողովրդին վերաբերող հարցերը մշտապես ուշադրության կենտրոնում պահելու, ինչպես նաև հայ ժողովրդին համերաշխության և աջակցության ցուցաբերման համար։ Բարձր է գնահատել խմբի նախագահ Լորան Վոքիեի շարունակական հանձնառությունը՝ ի նպաստ Հայաստանի հետ գործակցության զարգացմանն ու հայ ժողովրդի խնդիրների հասցեագրմանը։

Պատգամավորների խնդրանքով՝ ՀՀ դեսպանը ներկայացրել է Հարավային Կովկասում երկարատև խաղաղության և կայունության հաստատման, Ադրբեջանի հետ հարաբերությունների կարգավորմանն ուղղված՝ խաղաղության համաձայնագրի ստորագրման, Հայաստան-Ադրբեջան սահմազատման գործընթացի, ՀՀ կառավարության «Խաղաղության խաչմերուկ» նախաձեռնության համատեքստում տարածաշրջանային հաղորդակցությունների ապաշրջափակման վերաբերյալ Հայաստանի մոտեցումները։

Դեսպան Խաչատրյանն անդրադարձել է Հայաստան-Ֆրանսիա ընդգրկուն օրակարգին, մասնավորապես՝ բարձրագույն մակարդակով պարբերաբար շփումներին, երկու երկրների միջև դինամիկ զարգացող բազմաոլորտ, այդ թվում՝ ռազմավարական նշանակություն ունեցող ոլորտներում, համագործակցության ընդլայնմանը, ինչպես նաև Ֆրանսիայի աջակցությամբ իրականացվող այն ծրագրերին, որոնք նպաստում են Հայաստանի դիմակայունության ամրապնդմանը։

Դեսպանը խոսել է նաև Հայաստանում ժողովրդավարական ինստիտուտների ամրապնդմանն ուղղված կառավարության շարունակական ջանքերի, ինչպես նաև ԵՄ հետ խորացող համագործակցության մասին։ Քննարկվել են նաև տարածաշրջանային հարցեր։

Ֆրանսիա-Հայաստան բարեկամության խմբի անդամները, ի դեմս խմբի նախագահ Լորան Վոքիեի, վերահաստատել են Ազգային ժողովի և բարեկամական խմբի հանձնառությունը՝ ի նպաստ հայ-ֆրանսիական բարեկամության ամրապնդմանը, ՀՀ տարածքային ամբողջականությանն ու ինքնիշխանությանը, տարածաշրջանում խաղաղության հաստատմանն ուղղված Հայաստանի ջանքերին ու Հայաստան-Ֆրանսիա ռազմավարական գործընկերության զարգացմանը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր