Հայկական պատմամշակութային ժառանգությունը խորագրով գիտաժողով Փարիզում

24 դեկտեմբերի, 2023

Դեկտեմբերի 19-ին Ֆրանսիայի պատմամշակութային ժառանգության ինստիտուտում (INP) Ֆրանսիայի մշակույթի նախարարության նախաձեռնությամբ կայացավ «Հայկական պատմամշակութային ժառանգությունը» խորագրով գիտաժողով։

Գիտաժողովին բացման խոսքով հանդես եկան Ֆրանսիայի մշակույթի նախարար Ռիմա Աբդուլ-Մալաքը, Ֆրանսիայի ժառանգության ազգային ինստիտուտի տնօրեն Շառլ Պերսոնան և Ֆրանսիայում ՀՀ դեսպան Հասմիկ Տոլմաջյանը։

ՀՀ դեսպանն իր խոսքում մեծապես արժևորեց մշակույթի բնագավառում Հայաստանի պատմամշակութային հաստատությունների և Ֆրանսիայի առաջատար մշակութային կառույցների միջև ձևավորված արդյունավետ համագործակցությունը, ինչպես նաև Հայաստանի մշակութային հուշարձանների վերականգնման և պահպանման նպատակով իրականացվող ծրագրերը։ Դեսպանը երախտագիտություն հայտնեց նախարար Աբդուլ-Մալաքին հայ-ֆրանսիական մշակութային համագործակցությանը ցուցաբերած առանձնահատուկ ուշադրության համար։ Իր խոսքում դեսպանն անդրադարձավ նաև Արցախի պատմական և կրոնական ժառանգության ոչնչացման վտանգին, վերջին տասնամյակների ընթացքում Ադրբեջանի կողմից իրականացված հայկական մշակութային ժառանգության ոչնչացման և աղճատման քաղաքականությանը։

Գիտաժողովի ընթացքում զեկույցներով հանդես եկան պատմամշակութային ժառանգության ոլորտի Ֆրանսիայի այնպիսի առաջատար կառույցների ներկայացուցիչներ, ինչպիսիք են՝ Լուվրի թանգարանը, որը ներկայացված էր Բյուզանդական և Արևելքի քրիստոնեական ժառանգության, ինչպես նաև Հնագույն Արևելյան ժառանգության իր դեպարտամենտներով, Ազգային երկրագիտության թանգարանը, Իլ դը Ֆրանս ռեգիոնի մշակութային հարցերի տնօրինությունը, Շայոյի պատմության և հնագույն հուշարձանների պահպանման բարձրագույն կրթության կենտրոնը։ Զեկույցներ ներկայացրեցին նաև Արևելքի քրիստոնյաներ (Oeuvre d’Orient) կաթոլիկ կազմակերպության և Պատմամշակութային կոթողների թվայնացմամբ և վիրտուալ վերականգնմամբ զբաղվող ICONEM նախաձեռնության ներկայացուցիչները։ Գիտաժողովին Հայաստանից հրավիրված էին ՀՀ ԿԳՄՍՆ մշակութային ժառանգության և ժողովրդական արհեստների վարչության պետ Աստղիկ Մարաբյանը, ԹՈՒՄՈ ստեղծարար կենտրոնի և Հայաստանում հաստատված «Ռե-շկոլա» նախաձեռնության ներկայացուցիչները։

Երկու հատվածից բաղկացած գիտաժողովի ընթացքում ընդգրկուն կերպով ներկայացվեցին հայ-ֆրանսիական մշակութային համագործակցության ոլորտում իրականացվող կարևոր նախաձեռնությունները, այդ թվում՝ Լուվրի թանգարանի օժանդակությամբ Էրեբունի թանգարանի վերանորոգման, առաջիկայում Լուվրի թանգարանում Բյուզանդական և Արևելքի քրիստոնեական ժառանգությանը նվիրված դեպարտամենտի հիմնման և այնտեղ հայկական արժեքավոր ցուցանմուշների ընդգրկման ծրագրերը։

Գիտաժողովին անդրադարձ եղավ ինչպես Հայաստանի տարածքում, այնպես էլ՝ աշխարհասփյուռ հարուստ հայկական պատմամշակութային ժառանգությանը:

Զեկույցներ ներկայացվեցին Ֆրանսիայի հայկական սփյուռքի պատմության ու ժառանգության, Արցախի վտանգված պատմամշակութային հարուստ ժառանգության և դրա դիտավորյալ ոչնչացմանն ու խեղաթյուրմանն ուղղված ադրբեջանական քաղաքականության մասին: Անդրադարձ եղավ ժամանակակից տեխնոլոգիաների կիրառմամբ հայկական ժառանգության պահպանման ուղղությամբ իրականացվող ծրագրերին:

Ֆրանսիայի պատմամշակութային ժառանգության ինստիտուտի և Ֆրանկոֆոն թվային ինստիտուտի հետ համագործակցաբար անցկացված այս գիտաժողովին ներկա էին նաև մշակութային ոլորտի առաջատար կառույցների ներկայացուցիչներ, պատմաբաններ, ֆրանսիացի խորհրադարանականներ, ինչպես նաև հայ համայնքի ներկայացուցիչներ։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր