«Սիփան-Կոմիտաս» երգչախմբի երկարամյա ղեկավար Կարպիս Ափրիկյանի մեծարման երեկո

06 հոկտեմբերի, 2021

Հոկտեմբերի 6-ին Ֆրանսիայում Հայաստանի դեսպանությունում տեղի ունեցավ մեծարման երեկո՝ նվիրված ֆրանսահայ կոմպոզիտոր, երաժշտագետ, Ֆրանսիայում գործող «Սիփան-Կոմիտաս» երգչախմբի երկարամյա ղեկավար Կարպիս Ափրիկյանի գործունեությանը: Միջոցառման ընթացքում ֆրանսիացի հանրահայտ լրագրող և գրող Ֆիլիպ Մեյերը Կարպիս Ափրիկյանին հանդիսավոր կերպով հանձնեց արվեստի ոլորտում ծանրակշիռ ներդրում ունեցող գործիչներին շնորհվող Ֆրանսիայի բարձրագույն տիտղոս՝ «Արվեստի և գրականության կոմանդորի» («Commandeur de l’Ordre des Arts et des Lettres») պետական շքանշանը։

Իր խոսքում Ֆրանսիայում Հայաստանի դեսպան Հասմիկ Տոլմաջյանը շնորհավորեց մեծանուն ֆրանսահայ երաժշտագետին Ֆրանսիայի բարձրագույն պարգևին արժանանալու, ինչպես նաև ծննդյան 95-ամյա տարեդարձի կապակցությամբ՝ ընդգծելով, որ Կարպիս Ափրիկյանն իր բացառիկ տաղանդը ծառայեցրել է հայ ժողովրդական երգի և երաժշտության մշակման Կոմիտասյան գործի հարատևմանը՝ պատկառելի ժառանգություն թողնելով սերունդներին և հայ երգարվեստը շուրջ հինգ տասնամյակ լավագույնս ներկայացնելով Ֆրանսիայի ու աշխարհի հեղինակավոր բեմերում, ինչպես նաև հայրենիքում։

Կարպիս Ափրիկյանի մեծարման երեկոյին մասնակցում էին Ֆրանսիայի ականավոր արվեստագետներ, հասարակական գործիչներ, «Սիփան-Կոմիտաս» երգչախմբի ավագ և երիտասարդ սերնդի անդամներ, մաեստրոյի մտերիմներ ու հարազատներ, ինչպես նաև ֆրանսահայ համայնքի ներկայացուցիչներ։

Հայ մշակույթի, արվեստի, բնագավառներում ունեցած ստեղծագործական ակնառու նվաճումների համար Կարպիս Ափրիկյանին 2009թ․ շնորհվել է մշակույթի և արվեստի ոլորտի Հայաստանի Հանրապետության պետական բարձրագույն պարգև՝ Մովսես Խորենացի մեդալը։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր