Դեսպան Հասմիկ Տոլմաջյանի մասնակցությունը Մոն-դը-Մարսան քաղաքում 2022թ. կազմակերպվելիք «Երազ» հայկական մշակութային փառատոնի ներկայացման միջոցառմանը

30 սեպտեմբերի, 2021

Ս.թ. սեպտեմբերի 30-ին Ֆրանսիայում ՀՀ դեսպան Հասմիկ Տոլմաջյանը, մասնակցեց Մոն-դը-Մարսան քաղաքում 2022թ. մարտի 21-ից ապրիլի 3-ը կազմակերպվելիք «Երազ» խորագրով երկշաբաթյա հայկական մշակութային փառատոնի ներկայացման միջոցառմանը։

Դեսպանը շնորհակալություն հայտնեց Ֆրանսիայի հարավ-արևմտյան Նուվել Ակվիտեն շրջանում գտնվող Մոն-դը-Մարսանի քաղաքապետ Շառլ Դայոյին Հայաստանին նվիրված մշակութային փառատոնի նախաձեռնության համար, որը հնարավորություն կընձեռի ավանդական հայկական ներկայություն չունեցող Մոն-դը-Մարսան քաղաքում և Նուվել Ակվիտեն շրջանում երկու շաբաթվա ընթացքում ներկայացնել Հայաստանը, հայկական հնամենի մշակույթը, պատմությունը՝ խաչքարարվեստից, հոգևոր, ազգային երաժշտությունից, մինչև ժամանակակից արվեստ, ներառելով Փարաջանովի և երիտասարդ հայ նկարիչների ցուցադրությունները, Տիգրան Համասյանի ջազ-համերգը, ֆրանսահայ երաժիշտների կատարումները։

Այդ համատեքստում դեսպան Տոլմաջյանն ընդգծեց Մոն-դը-Մարսան քաղաքում «Երազ» փառատոնի նշանակությունը հայ-ֆրանսիական բազմադարյա բարեկամության շարունակական ամրապնդման գործում, որը համագործակցության նոր հնարավորություններ կստեղծի ինչպես հայ և ֆրանսիացի արվեստագետների և ստեղծագործողների միջև, այնպես էլ կխթանի ապակենտրոնացված համագործակցությունը՝ հաշվի առնելով քույր քաղաքներ հռչակվելու Գյումրիի և Մոն-դը-Մարսանի մտադրությունը։

Փառատոնի լուսաբանման ընթացքում ելույթներով հանդես եկան նաև Մոն-դը-Մարսանի քաղաքապետ Շառլ Դայոն, Մոն-դը-Մարսանի «Գասկոնյը» թատրոնի տնօրեն Անտուան Գարիելը, «Լը Ֆիգարո Մագազին» պարբերականի փոխտնօրեն, լրագրող Ժան-Քրիստոֆ Բուիսոնը և ֆրանսահայ լուսանկարիչ Անտուան Ագուջյանը։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր