Հայաստանին նվիրված միջոցառում Փարիզի մերձակա Կլամար քաղաքում

26 մայիսի, 2025

Փարիզի մերձակա հայաշատ Կլամար քաղաքում անցկացվել է «Հայաստանի օր» ամենամյա մշակութային փառատոնի 10-րդ հոբելյանական թողարկումը։ Քաղաքի մշակութային այցեքարտ դարձած այս փառատոնն այս տարի անցկացվել է աննախադեպ մեծ շուքով․ շուրջ մեկ շաբաթ շարունակ՝ մայիսի 18-ից 25-ը, Կլամարում տեղի են ունեցել հայկական հարուստ մշակույթը ներկայացնող բազմաժանր միջոցառումներ՝ համերգներ, ցուցահանդեսներ, կլոր սեղան-քննարկումներ, ֆիլմերի ցուցադրություն։

Մայիսի 24-ին Կլամարի քաղաքապետարանի հարակից հրապարակում անցկացվել է տոնավաճառ, որի շրջանակներում ներկայացված են եղել հայ մշակույթի, պատմության վերաբերյալ ֆրանսերենով լույս տեսած հրատարակություններ, մանկական գրականություն, հայկական մանրանկարչությունը, ժողովրդական արհեստները, հայկական գինեգործական արտադրանքը, պահածոյացված ապրանքատեսակներ, հայկական խոհանոցը։ Բազմաթիվ այցելուների առանձնակի ուշադրության կենտրոնում են եղել ֆրանսահայ կազմակերպությունների տաղավարները, որոնք լուսաբանում էին իրենց կողմից Հայաստանում իրականացվող բարեգործական ծրագրերը։

Նույն օրը՝ միջոցառման բացման պաշտոնական մասում, ելույթներով են հանդես եկել Ֆրանսիայում ՀՀ դեսպանության խորհրդական Վարդուհի Սահակյանը, Ֆրանսիայի Ազգային ժողովի պատգամավոր Ժան-Դիդյե Բերժեն, Կլամարի քաղաքապետ Իվ Կոսկասը։ Հատուկ հյուրի կարգավիճակով տոնական միջոցառմանը մասնակցել են իրավաբան Ֆրանսուա Դևեջյանը և լուսանկարիչ Անտուան Ագուջյանը։

Միջոցառման ընթացքում ցուցադրվել է Կլամարի քույր քաղաք Արտաշատ համայնքի ղեկավար Կառլեն Մկրտչյանի շնորհավորական տեսաուղերձը։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր