Հանդիսավոր ընդունելություն Փարիզում՝ նվիրված ՀՀ զինված ուժերի կազմավորման 32-րդ տարեդարձին

15 փետրվարի, 2024

Փետրվարի 13-ին Փարիզում տեղի ունեցավ ՀՀ զինված ուժերի կազմավորման 32-րդ տարեդարձին նվիրված հանդիսավոր ընդունելություն, որին մասնակցեցին Ֆրանսիայի նախագահի աշխատակազմի, արտաքին գործերի և զինված ուժերի նախարարությունների բարձրաստիճան ներկայացուցիչներ, Ազգային ժողովի պատգամավորներ, Սենատի անդամներ, Ֆրանսիայում հավատարմագրված դեսպաններ և ռազմադիվանագիտական անձնակազմի ներկայացուցիչներ, ինչպես նաև հասարակական գործիչներ և ֆրանսահայ համայնքի ներկայացուցիչներ։

Իր խոսքում դեսպան Տոլմաջյանը, շնորհավորելով ՀՀ զինված ուժերի 32-րդ տարեդարձը, նշեց, որ Հայոց բանակի ստեղծումն անմիջականորեն և անքակտելիորեն միահյուսված է հայ ժողովրդի բազմաթիվ սերունդների երազանքի՝ անկախ հայկական պետականության վերականգնման հետ։ Հայաստանի անկախության առաջին իսկ օրվանից բանակը դիմակայում է անվտանգային լուրջ մարտահրավերների, և այսօր էլ այն Հայաստանի անկախության գլխավոր երաշխավորն է:

Դեսպանը գոհունակությամբ անդրադարձ կատարեց Հայաստանի և Ֆրանսիայի միջև պաշտպանության ոլորտում համագործակցությանը՝ բարձր գնահատելով ֆրանսիացի գործընկերների հետ համագործակցության մակարդակը։

Վկայակոչելով հայ-ֆրանսիական՝ հազարամյա պատմություն ունեցող բարեկամական կապերը՝ դեսպանը հիշեցրեց առաջին և երկրորդ աշխարհամարտերի ժամանակ երկու ժողովուրդների սերտ զինակցության հերոսական դրվագները, այդ թվում՝ հայազգի մարտիկների մասնակցությունը Ֆրանսիայի դիմադրության շարժմանը։

Երեկոյի ընթացքում ելույթով հանդես եկավ նաև Ֆրանսիայում Հայաստանի ռազմական կցորդ, գնդապետ Գևորգ Ղոնյանը։ Վերջինս ընդգծեց ՀՀ զինված ուժերի պաշտպանական կարողությունների ամրապնդման ուղղությամբ Ֆրանսիայի ցուցաբերած աջակցության կարևորությունը, ինչը հնարավորություն է ընձեռում Հայաստանի զինված ուժերին ավելի արդյունավետ իրականացնել Հայաստանի պաշտպանության կարևորագույն առաքելությունը։

Ընդունելությանը «Դպրոցասեր» հայկական վարժարանի սաների կատարմամբ՝ տնօրեն Հայկ Սարգսյանի ղեկավարությամբ, հնչեցին Հայաստանի և Ֆրանսիայի ազգային օրհներգերը, Փարիզի «Պասկալ» լիցեյի աշակերտ Թիբո Հյուիսիեի կողմից ընթերցվեց Ֆրանսիայի Դիմադրության շարժման հերոս Միսաք Մանուշյանի վերջին նամակն՝ ուղղված տիկնոջը՝ Մելինեին։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր