Ֆրանսիայի նախագահը մասնակցեց ֆրանսահայ կազմակերպությունների համակարգող խորհրդի ամենամյա ընթրիքին

08 փետրվարի, 2017

Փետրվարի 8-ին Փարիզում կայացավ Ֆրանսահայ կազմակերպությունների համակարգող խորհրդի կողմից կազմակերպվող ամենամյա ընթրիքը, որին ներկա են գտնվել Ֆրանսիայի նախագահ Ֆրանսուա Օլանդը, Եվրոպական հարցերով պետքարտուղար Արլեմ Դեզիրը, Հիշատակի և նախկին ռազմիկների հարցերով պետքարտուղար Ժան Մարկ Տոդեսկինին, Փարիզի քաղաքապետ Ան Իդալգոն, Իլ դե Ֆրանսի շրջանային խորհրդի նախագահ Վալերի Պեկրեսը և փոխնախագահ Պատրիկ Քարամը, Օ-դը-Սեն դեպարտամենտի նախագահ Պատրիկ Դեվեջյանը, Ֆրանսիայի Սենատի և Ազգային ժողովի պատգամավորներ, քաղաքապետեր, Ֆրանսիայում հավատարմագրված դեսպաններ, ֆրանսահայ գործարարներ, լրագրողներ, արտիստներ, երաժիշտներ, ֆրանսահայ և այլ ազգային կազմակերպությունների ղեկավարներ և այլք:

Ընթրիքին ներկա են գտնվել Ֆրանսիայում ՀՀ դեսպան Վիգեն Չիտեչյանը և Շվեյցարիայի Համադաշնությունում ՀՀ դեսպան, ՅՈՒՆԵՍԿՕ-ում ՀՀ մշտական ներկայացուցիչ Շառլ Ազնավուրը:

Ֆրանսիայի նախագահ Ֆրանսու Օլանդը ներկաներին տեղեկացրեց, որ ՀՀ նախագահ Սերժ Սարգսյանին հրավիրել է պաշտոնական այց կատարել Ֆրանսիա, որը տեղի կունենա մարտի 8-ին: Խոսելով Հայաստանի և Ֆրանսիայի միջև դիվանագիտական հարաբերությունների հաստատման 25-ամյակի մասին` Ֆրանսիայի նախագահը նշեց, որ Հայաստանի նախագահի այցը լավ առիթ կհանդիսանա ամփոփելու 25 տարվա ընթացքում իրականացվածը, խոսելու տնտեսական, մշակութային, կրթական և այլ ոլորտներում համագործակցության ընդլայնման, ինչպես նաև երկկողմ հետաքրքրություն ներկայացնող այլ հարցերի մասին:

Ֆրանսիայի նախագահն անդրադարձավ նաև Լեռնային Ղարաբաղի հակամարտության կարգավորման գործընթացին` նշելով, որ Ֆրանսիան, Ռուսաստանի և ԱՄՆ հետ մեկտեղ, հատուկ պատասխանատվություն ունի այս հարցում:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր