ՀՀ Անկախության 23-րդ տարեդարձին նվիրված միջոցառումներ Ֆրանսիայում

23 սեպտեմբերի, 2014

Սեպտեմբերի 22-ին «Հայաստանի դեսպանության բարեկամներ» հասարակական կազմակերպության նախաձեռնությամբ տեղի ունեցավ ավանդական պաշտոնական ընդունելությունը՝ նվիրված Հայաստանի Հանրապետության Անկախության 23-րդ տարեդարձին: Ընդունելությանը ներկա գտնվեցին «Հայաստանի դեսպանության բարեկամներ» կազմակերպության մի քանի տասնյակ անդամներ, ֆրանսահայ հասարակական գործիչներ, ֆրանսահայ հոգևորականության և մամուլի ներկայացուցիչներ:

Դիմելով հյուրերին, Ֆրանսիայում ՀՀ դեսպան Վիգեն Չիտեչյանը նախ շնորհավորանքի խոսք ասաց Անկախության տոնի կապակցությամբ Հայաստանի բարձրագույն պարգևների արժանացած ֆրանսահայ գործիչներին, այնուհետեւ ներկայացրեց Անկախության օրվա իր ուղերձը։

Սեպտեմբերի 23-ին դեսպան Չիտեչյանը մեկնեց Մարսել՝ մասնակցելու ՀՀ Անկախության տարեդարձին նվիրված ՀՀ գլխավոր հյուպատոսությունում ընդունելությանը: Միջոցառմանը, մասնակցում էին Մարսել-Պրովանս-Մետրոպոլ համայնքի նախագահ-պատգամավոր Գի Տեսիեն, քաղաքապետեր, մարզային, շրջանային և համայնքային իշխանությունների ներկայացուցիչներ, Ֆրանսիայի խորհրդարանականներ, Մարսելում հավատարմագրված գլխավոր հյուպատոսներ, ֆրանսահայ հոգևորականության ներկայացուցիչներ, քաղաքական, հասարակական և մշակութային հարյուրավոր գործիչներ։

Ընդունելության բացման ելույթով հանդես եկավ Մարսելում ՀՀ գլխավոր հյուպատոս Վարդան Սիրմաքեշը: Ցուցադրվեցին ցուցանմուշներ «Արմենիակա` հայկական ճարտարապետության ուսումնասիրության առաջամարտիկները» խորագրով ցուցահանդեսից, ներկայացվեցին նաև Անի Տոնապետյանի հայկական մոտիվներով ձեռագործ աշխատանքները: Արամ Խաչատրյանի երաժշտության ներքո տեղի ունեցած հյուրասիրության ավարտին` ցուցադրվեց հանրապետության հրապարակի «շատրվանների սիմֆոնիա» տեսանյութը:

Ընդունելության արարողությունը հեռարձակվեց Ֆրանս-3 հեռուստաալիքով և լայնորեն լուսաբանվեց տեղական հեռուստատեսությունների և մամուլի կողմից :

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր