ԱԳ նախարարն ընդունեց Ֆրանսիայի խորհրդարանականների պատվիրակությանը

06 սեպտեմբերի, 2014

Սեպտեմբերի 6-ին ԱԳ նախարար Էդվարդ Նալբանդյանն ընդունեց Ֆրանսիայի Ազգային ժողովում սոցիալիստական կուսակցության խմբակցության ղեկավար Բրյունո լը Ռուի գլխավորած պատվիրակությանը, որը Երևան է ժամանել ֆրանսիացի հասարակական-քաղաքական գործիչ, հայ ժողովրդի բարեկամ, հումանիստ Ժան Ժորեսի մահվան 100-րդ և Հայոց Ցեղասպանության 100-րդ տարելիցների կապակցությամբ անցկացվող միջոցառումների շրջանակներում:

Ողջունելով հյուրերին` նախարար Նալբանդյանն ընդգծեց, որ հայ ժողովուրդը երախտագիտությամբ է հիշում իր մեծ բարեկամ Ժան Ժորեսի` Օսմանյան կայսրությունում հայերի հալածանքների և կոտորածների նկատմամբ Եվրոպայում անտարբերության դեմ բարձրացրած բողոքի ձայնը և կարևորեց Հայաստանում հումանիստի 100-ամյա տարելիցին նվիրված միջոցառումներին ֆրանսիացի խորհրդարանականների պատվիրակության մասնակցությունը:

ԱԳ նախարարը նշեց, որ Հայաստանի և Ֆրանսիայի միջև ձևավորվել են առաձնաշնորհյալ հարաբերություններ, ընթանում է բարձր մակարդակի կանոնավոր քաղաքական երկխոսություն: Երկու օր առաջ նախագահներ Սարգսյանն ու Օլանդը առիթ ունեցան հանդիպելու և անդրադառնալու երկկողմ հագեցած օրակարգի տարբեր հարցերին, այդ թվում նախագահ Օլանդի ս.թ. մայիսին Հայաստան պետական այցի շրջանակներում ձեռքբերված պայմանավորվածությունների իրականացմանը:

Կողմերը կարևորեցին տարբեր ոլորտներում համագործակցության ընդլայնումը, որի համար տարիների համատեղ աշխատանքի շնորհիվ լավ հիմք է դրվել:

Ընդգծվեց, որ հայ-ֆրանսիական հարաբերություններում առանձնահատուկ տեղ է զբաղեցնում խորհրդարանական փոխգործակցությունը, որի վկայությունն են ֆրանսիացի օրենսդիրների պարբերական այցելությունները Հայաստան և Լեռնային Ղարաբաղի Հանրապետություն:

Զրույցի ընթացքում մտքեր փոխանակվեցին Հայոց ցեղասպանության 100-րդ տարելիցի կապակցությամբ նախատեսվող միջոցառումների շուրջ, կարևորվեց ցեղասպանությունների ժխտման քրեականացումը, մարդկության դեմ ոճիրների կանխարգելման մեխանիզմների կատարելագործումը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր