«Սումգայիթյան ջարդերից 25 տարի անց. Լեռնային Ղարաբաղի ժողովրդի ապագայի հեռանկարները» կոնֆերանս Ֆրանսիայի Ազգային ժողովում

27 փետրվարի, 2013

Փետրվարի 26-ին Ֆրանսիայի Ազգային Ժողովում ի հիշատակ Սումգայիթյան ջարդերի 25-րդ տարելիցի և Ղարաբաղյան շարժման 25-ամյակի կապակցությամբ կայացավ կոնֆերանս, որին ներկա էին մի շարք ֆրանսիացի սենատորներ և պատգամավորներ, ֆրանսահայ համայնքային կառույցների ղեկավարներ, լրագրողական և հասարակական շրջանակների ներկայացուցիչներ:

Կոնֆերանսի ընթացքում ելույթով հանդես եկավ Ֆրանսիայում ՀՀ դեսպան Վիգեն Չիտեչյանը: Շնորհակալություն հայտնելով Ֆրանսիայի «Հայ դատի» գրասենյակին միջոցառումը նախաձեռնելու համար` դեսպան Չիտեչյանը ներկայացրեց Ղարաբաղյան հակամարտության պատմական ակունքները և 1988 թվականին Արցախի ժողովրդի ինքնորոշման պայքարի նոր փուլը, որին ի պատասխան կազմակերպվեցին և իրականացվեցին հայերի ջարդերը Սումգայիթում:

«Արցախի ժողովրդի կողմից իր ճակատագիրը տնօրինելու իրավունքը պետք է իրավական ճանաչում ստանա. որևէ տրամաբանությամբ չի կարելի բացատրել, թե ինչու մի ժողովուրդ, որն իրականացրել է ինքնորոշման իր իրավունքը, այնուհետև ամրագրել այն պատերազմում, պետք է մաս կազմի իր դեմ պատերազմ սանձազերծած պետության», նշել է դեսպան Չիտեչյանը: Շարունակելով իր խոսքն Ադրբեջանում վերջին տարիներին կատարվող մտահոգիչ զարգացումների վերաբերյալ, դեսպանը մասնավորապես նշել է պետական մակարդակով հայատյացության ցայտուն դրսևորումները, ինչպիսիք են Գուրգեն Մարգարյանին սպանած ադրբեջանցի հանցագործի հերոսացումը և հայտնի գրող Աքրամ Այլիսլիի դեմ ուղղված` բռնատիրական ռեժիմին բնորոշ արշավը, հավելելով, որ «Ադրբեջանի ներկայիս ղեկավարության կողմից արվում է ամեն հնարավոր քայլ ադրբեջանական հասարակությանը ոչ թե խաղաղությանը, այլ պատերազմի պատրաստելու նպատակով»:

«Այսօր Ադրբեջանն ամեն կերպ փորձում է մոռանալ կամ տպավորություն ստեղծել թե մոռացել է այն պատմական իրողությունը, որ հրադադարի եռակողմ պայմանագիրը 19 տարի առաջ աղերսվել է հենց իր կողմից` ընդ որում խնդրելով հրադադարը Արցախի իշխանություններից», հայտարարել է դեսպանը և եզրափակել իր խոսքը խաղաղության և հանդուրժողականության կոչով:

Կոնֆերանսի ընթացքում ելույթներով հանդես եկան Ֆրանսահայ կազմակերպությունների համակարգող խորհրդի համանախագահ Մուրադ Փափազյանը, Ֆրանսիայում ԼՂՀ ներկայացուցիչ Հովհանես Գևորգյանը և Ֆրանսիայի Ազգային Ժողովի Հայաստան-Ֆրանսիա բարեկամական խմբի նախագահ Ռենե Ռուքեն:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր